Saturday, December 30, 2006

ചില വര്‍ഷാവസാന ചിന്തകള്‍

സുഹൃത്തുക്കളെ,
ഒരു വര്‍ഷം കൂടി കത്തി തീരാന്‍ പോകുന്നു.സാധാരണ പുതുവര്‍ഷം വരുന്നു എന്ന് പറഞ്ഞാല്‍ എനിക്ക്‌ വലിയ പുതുമ ഒന്നും തോന്നാറില്ല.ന്യു ഈയര്‍ കലപരിപാടി എന്നും പറഞ്ഞ്‌ കുറെ കള്ളടിക്കും.എന്നിട്ട്‌ ബോധമില്ലാതെ വണ്ടിയോടിച്ച്‌ എവിടെയെങ്കിലും പോയി ചാര്‍ത്തും,അല്ലെങ്കില്‍ പോലീസ്‌ പിടിച്ച്‌ ചാര്‍ത്തും.ഇതൊക്കെ ന്യു ഈയര്‍ വൈകുന്നേരങ്ങളില്‍ മാത്രം സംഭവിക്കുന്ന കാര്യമല്ലാത്തത്‌ കൊണ്ട്‌ എനിക്ക്‌ പ്രത്യേകിച്ച്‌ ഒന്നും തോന്നാറുമില്ല.
പക്ഷെ ഈ പുതുവര്‍ഷം തീര്‍ച്ചയായും എനിക്ക്‌ പുതുമയുള്ളതാണു.കാരണം ജീവിതത്തില്‍ ആദ്യമായി ഞാന്‍ പുതുവര്‍ഷാശംസകള്‍ നേരാന്‍ പോകുന്നു.ആര്‍ക്കെങ്കിലും ഒരു ന്യു ഈയര്‍ കാര്‍ഡോ ക്രിസ്തുമസ്‌ കാര്‍ഡോ അയച്ചതായി എന്റെ ഓര്‍മ്മയില്‍ പോലും ഇല്ല.31-നു രാത്രി എസ്‌.എം.എസ്‌ പ്രളയം കൊണ്ട്‌ മൊബൈല്‍ സര്‍വീസുകള്‍ ജാം ആകുമത്രേ.ഇതു വായിച്ച്‌ ഞാന്‍ ചിരിച്ചു.എസ്‌.എം.എസ്‌ പോലും.31-നു രാത്രി പന്ത്രണ്ട്‌ മണിക്ക്‌ സെല്‍ എവിടെ ആണെന്ന് പോലും ഓര്‍മ്മ ഉണ്ടാവില്ല.പിന്നല്ലേ എസ്‌.എം.എസ്‌.
സാധാരണ മൂന്ന് യൂണിറ്റ്‌ ആയിട്ടാണു എന്റെ പ്രവര്‍ത്തന മേഖല.കുടുംബം,കൂട്ടുകാര്‍,തൊഴില്‍.ഇപ്പോള്‍ നാലാമതൊന്ന് കൂടി കിട്ടി.മുന്‍പിലെ പി.സി. തുറന്നാല്‍ കിട്ടുന്ന അത്ഭുത മേഖല.ഭൂലോഗം മുഴുവന്‍ പരന്ന് കിടക്കുന്ന ബൂലോഗം.അവിടെ അനേകം കൂട്ടുകാര്‍.അവരുടെ നര്‍മ്മ ലേഖനങ്ങള്‍,കാര്യമാത്ര പ്രസക്തമായ ചര്‍ച്ചകള്‍,കവിതകള്‍,കവിതകളെന്ന് അവകാശപ്പെടുന്ന കവിതകള്‍,കഥകള്‍,വിജ്ഞാന തുണ്ടുകള്‍,തര്‍ക്കങ്ങള്‍,സ്നേഹാന്വേഷണങ്ങള്‍,ആശംസകള്‍,വെല്ലുവിളികള്‍,കരച്ചിലുകള്‍,തൊഴുത്തില്‍ കുത്തുകള്‍,സ്നേഹ പാരകള്‍,ഗ്രൂപ്പുകള്‍.
'ഇത്‌ കലിപ്പ്‌ ഏര്യേണു,വിട്ടോ'എന്ന് പറഞ്ഞവന്‍ പിറ്റേ ദിവസം 'അളിയാ നീ ഇന്നലെ എവിടേര്‍ന്ന്'എന്ന് ചോദിക്കുന്നത്‌ ബൂലോഗം സ്പെഷ്യല്‍.
എനിക്ക്‌ വളരെയധികം രസകരമായി തോന്നിയ ചില പോസ്റ്റുകളുണ്ട്‌.പക്ഷേ പോസ്റ്റുകളേക്കാള്‍ സന്ദര്‍ഭത്തിനൊത്ത ചില കമന്റുകള്‍ എന്നെ ചിരിപ്പിച്ചിട്ടുണ്ട്‌ ചിന്തിപ്പിച്ചിട്ടുണ്ട്‌.
ഇടിവാളിന്റെ മിന്നല്‍ പുരാണമാണു എന്നെ ഏറ്റവുമധികം ചിരിപ്പിച്ച പോസ്റ്റ്‌.കൊച്ചു മിന്നലിന്റെ അഭ്യാസങ്ങള്‍ എന്നെ എന്റെ കുട്ടിക്കാലത്തേക്ക്‌ ചുമന്ന് കൊണ്ട്‌ പോയി.
വിശാലന്റെ ചില പ്രയോഗങ്ങള്‍[കര്‍ത്താവേ.. ഈ മനുഷ്യന്‍].കടന്നല്‍ കൂട്ടത്തില്‍ നിന്നും രക്ഷപെടാനായി ഉടുതുണിയില്ലാതെ കന്യസ്ത്രീകളുടെ നേരെ പാഞ്ഞു ചെന്ന വിശാലന്റെ കഥാപാത്രം എന്നെ ചിരിപ്പിച്ചതിനു കണക്കില്ല.
കടിക്കാന്‍ വരുന്ന പട്ടിയുടെ മുന്നില്‍ ലോക ചരിത്രത്തില്‍ ആദ്യമായിട്ടായിരിക്കും ഒരാള്‍ 'ഗട്ടാംബൂച്ചിയില്‍' നില്‍ക്കുന്നത്‌.[കീരി ബാബു]
കുറുമാന്‍ എന്ന ധീരവീരശൂര പരാക്രമിയുടെ പോസ്റ്റുകളേക്കാള്‍ എനിക്ക്‌ രസകരമായി തോന്നിയത്‌ പുള്ളിയുടെ ചില കമന്റുകളാണു.സിബു സ്ഥലം മാറുന്നു എന്ന പോസ്റ്റിനു താഴെ കുറുമനുഷ്യന്‍ കലിതുള്ളി.ആര്‍ എങ്ങോട്ട്‌ മാറിയാ ഞങ്ങള്‍ക്കെന്താ എന്നാണു കുറു ചോദിച്ചത്‌.കൊല്ലത്തെ കണ്ടല്‍ കാടുകളെ കുറിച്ചുള്ള പോസ്റ്റില്‍ കുറുമാന്‍ ഒരു ഭിക്ഷാംദേഹിയെ അരച്ച്‌ കലക്കി കുടിക്കുന്നതു കണ്ടു.
അനുഭവങ്ങളും കവിതകളുമായി രംഗം കൊഴുപ്പിക്കാറുള്ള സുല്‍ കഴിഞ്ഞ ദിവസം എന്നെ സംശയത്തിലാഴ്ത്തി.ഈ സുല്ലും ശ്രീലേഖ പോലീസും ഒരാളാണോ എന്ന്.
'വനിതകളെ വിമര്‍ശിച്ചാല്‍ ഇവിടെ കൊല നടക്കും' എന്ന പ്രസാദ്‌ മാഷിന്റെ കമന്റ്‌ കണ്ടപ്പോഴാണു,എങ്കില്‍ പിന്നെ ആ വഴിക്കൊന്ന് ശ്രമിക്കാം എന്ന് കരുതിയത്‌.വിമര്‍ശിക്കാന്‍ തലയില്‍ ആള്‍ താമസം വേണം.അതില്ലത്തത്‌ കൊണ്ട്‌ ഒന്ന് 'ഞോണ്ടി' നോക്കാം എന്ന് തന്നെ ഞാന്‍ തീരുമാനിച്ചു.എന്റെ മുന്നില്‍ വന്ന് പെട്ട ഏക സ്ത്രീരത്നമായ സു-വിനെ ഞോണ്ടാന്‍ വടിയെടുത്തതും കണ്ണൂര്‍ നിന്ന് ഒരു കല്ല് എന്റെ തലയില്‍ വന്ന് വീണു.അങ്ങോട്ട്‌ കൊട്ടാന്‍ ആലോചിച്ചപ്പോഴേ ഇങ്ങോട്ട്‌ കിട്ടി.സു-വിന്റെ പാചകത്തിനിടക്ക്‌ ആരോ ചോദിച്ചു,സു-'ഇത്‌ ഒഴിച്ചാല്‍ അത്‌ പിരിഞ്ഞു പോകില്ലേ'.സു-വിന്റെ മറുപടി-'പിരിഞ്ഞ്‌ പോണവര്‍ പോകട്ടെ'.
അയ്യോ വല്യമ്മായി ഇവിടെ ഉണ്ടായിരുന്നല്ലേ.അപ്പോല്‍ രത്നത്തിന്റെ എണ്ണം കൂടി.കപ്പി വലിക്കുന്നവന്‍ കപ്പിത്താന്‍ എന്ന് എന്നെ പഠിപ്പിച്ച വല്യമ്മായിയും തറവാടിയും ഹസും ഹസിയുമാണെന്ന് എനിക്ക്‌ അറിയില്ലായിരുന്നു.ഒരു പോസ്റ്റില്‍ വല്യമ്മായി ഏതോ അനോണിയെ കഴുത്തിനു പിടിക്കുന്നത്‌ കണ്ട്‌,ആ പോസ്റ്റും പിന്നെ പഴയ പോസ്റ്റും ഒക്കെ കുത്തിയിരുന്ന് വായിച്ചാണു ആ റിലേഷന്‍ ഞാന്‍ മനസ്സിലാക്കിയത്‌.
പിന്നെ മനുഷ്യനെ പേടിപ്പിക്കാനായി കുറേ ജന്മങ്ങള്‍.കലേഷ്‌,ഉമേഷ്‌,പെരിങ്ങോടന്‍,പ്രസാദ്മാഷ്‌,ലോനപ്പന്‍,ലാപ്പുട.എനിക്ക്‌ സമയമില്ലാത്തത്‌ ഇവരുടെ ഭാഗ്യം.[അല്ലാതെ വിവരമില്ലാത്ത്‌ കൊണ്ടല്ല]അല്ലെങ്കില്‍ വിമര്‍ശിച്ച്‌ ഞാന്‍ കൊന്നേനേ എല്ലാത്തിനേം.ഇത്രെ ഒള്ളൂ എന്ന് കരുതി ഇരിക്കുമ്പോ ദേ വരുന്നു അടുത്ത പട.ഒരു രാജേഷ്‌ വര്‍മ്മ്.എഴുതിയത്‌ ഇ.എം.എസ്‌-നെ കുറിച്ചാണെന്ന് ആദ്യം പറഞ്ഞത്‌ നന്നായി.വല്ല ആന്റണിയെ കുറിച്ചോ മറ്റോ ആയിരുന്നെങ്കില്‍ എന്റെ വിധം മാറിയേനേ.അതിനിടക്ക്‌ വല്യമ്മായിയുടെ[അതോ അതുല്യ ആണൊ] ഒരു കമന്റ്‌ കണ്ടു.മലയാളം എം.എ കഴിഞ്ഞ ഒരു പെങ്കൊച്ച്‌ ഇതേ സൈസില്‍ തയാറായി നില്‍പ്പുണ്ടത്രെ.കര്‍ത്താവേ, രണ്ടെണ്ണം വിട്ടോണ്ടേ ബ്ലോഗ്‌ വായിക്കാന്‍ പറ്റൂ എന്നാവോ.എന്തായാലും സങ്കുചിതന്റെ വീഞ്ഞ്‌ ഭരണി കണ്ട്‌ 'സങ്കു വാറ്റ്‌ തുടങ്ങിയോ'എന്ന് പെരിങ്ങോടന്റെ കമന്റിനു നൂറില്‍ നൂറ്റൊന്ന് മാര്‍ക്ക്‌.
ദേവേട്ടന്‍ ഒരു പോസ്റ്റില്‍ പറഞ്ഞു 'കാറ്റുള്ളപ്പോള്‍ തൂറ്റണം'. താഴെ അരവിന്ദന്റെ കമന്റ്‌.'ദേവേട്ടനത്‌ പറയാം.കാറ്റ്‌ വരുന്നതും നോക്കി എത്ര നേരാ ഒരു മനുഷ്യന്‍ ഇരിക്കണത്‌.'പുറകേ ദേവേട്ടന്റെ വിശദീകരണം,അരവിന്ദന്റെ -എന്റെ തമാശ ചീറ്റി പോയേ എന്നും പറഞ്ഞുള്ള കരച്ചില്‍.ചിരിക്കാതെ എന്തു ചെയ്യും.
വിവാഹിത-അവിവാഹിത-അവിഹിത ഏറ്റുമുട്ടലുകള്‍ ഇപ്പോള്‍ കാണാറില്ല.രണ്ട്‌ പക്ഷവും കൊണ്ടും കൊടുത്തും മുന്നേറുന്നത്‌ ചിരിക്ക്‌ വക നല്‍കിയിരുന്നു.ബാച്ചി മുന്നണിയിലെ പോരാളികളായ ദില്‍ബുവും,പച്ചാളവും,ശ്രീജിത്തുമൊക്കെ ഇപ്പോഴും ജീവനോടെ ഉണ്ടോ.അതോ മറ്റവന്മാര്‍ തല്ലി കൊന്നോ.എന്തൊക്കെ പറഞ്ഞാലും ഞാന്‍ നിങ്ങടെ കൂടെയാണു കേട്ടോ.
ഒരു പോസ്റ്റില്‍[പേര്‍ ഓര്‍ക്കുന്നില്ല]കള്ള്‌ കുടിക്കുന്നവരെ ഇഷ്ടമല്ല എന്നും,എന്നാലും കേക്ക്‌ ഉണ്ടാക്കാന്‍ എന്നും പറഞ്ഞ്‌ ഭര്‍ത്താവ്‌ കുപ്പി വാങ്ങിച്ച്‌ വച്ച്‌ കുടിക്കുന്നു എന്നൊക്കെ വായിച്ചു.[അങ്ങനെ തന്നെയല്ലെ]അപ്പോഴേ ബാച്ചികള്‍ക്ക്‌ ഒരു ഉപദേശം കൊടുക്കണമെന്ന് വിചാരിച്ചതാ.കെട്ടാന്‍ വല്ല ഉദ്ദേശവുമുണ്ടെങ്കില്‍ വല്ല എക്സ്‌-മിലിട്ടറിക്കാരന്റെ മോളേം കെട്ടണം.അത്‌ പറ്റിയില്ലെങ്കില്‍ ആഴ്ചയില്‍ എഴ്‌ ദിവസവും വീട്ടില്‍ കേക്ക്‌ ഉണ്ടാക്കണം...എപ്പടി.
കിരണ്‍സ്‌ പാടണത്‌ മനസ്സിലാക്കാം.പുള്ളി നേരത്തേ ചെയ്യണ പണിയാണത്‌.ദേ കഴിഞ്ഞ ദിവസം പൊന്നമ്പലോം പാടി. പണിക്കര്‍ സാര്‍ വടിയെടുക്കും.
കേരളഫാര്‍മര്‍ ഇപ്പഴും റബ്ബര്‍ വെട്ട്‌,തേങ്ങ വെട്ട്‌,മരുന്നടി[കൃഷിക്ക്‌ മരുന്നടിക്കണ കാര്യമാണു പറഞ്ഞത്‌...അല്ലാതെ]കളപറിക്കല്‍,തടമെടുക്കല്‍ ഒക്കെയായിട്ട്‌ നടക്കുവാ.അല്ല...ഇങ്ങനെ ആരെങ്കിലുമൊക്കെ ഇവിടെ വേണ്ടേ.
പിന്നെ എല്ലാം ക്ഷമിക്കാനും സഹിക്കാനും തയാറായി ഒരു വേണു ഇവിടെ കറങ്ങുന്നുണ്ട്‌.'എന്തിനും തയാര്‍ വേണു'.
ഞാന്‍ വരുമ്പോള്‍ മുരളിവാളൂരിനു താടിയുണ്ടായിരുന്നു.പിന്നെ ഒരു ദിവസം നോക്കിയപ്പോള്‍ മുരളീടെ രോമം മുഴുവന്‍ കൊഴിഞ്ഞ്‌ പോയി.മുരളിടെ ഒരു പോസ്റ്റില്‍ ടി.പത്ഭനാഭനെ കുറിച്ച്‌ ഞാന്‍ വെറുതെ ഒന്ന് കമന്റിയതിനു ,ഹൊ...ആ മേനോന്‍-നിനക്കിട്ടാടാ ഇത്‌ എന്ന് നേരേ പറയാതെ താങ്ങിയ ഒരു താങ്ങ്‌.അഞ്ച്‌ ദിവസം ഞാന്‍ സിസ്റ്റത്തില്‍ തൊട്ടില്ല.അതേന്നേ...കുട്ടന്‍ മേനോന്‍ തന്നെ.
കഴിഞ്ഞ ദിവസം ഒരു പട അവതരിച്ചു.പേര്‍ വിവി.ത്രിശൂര്‍ക്കാരനാ.എന്റമ്മേ...ഈ ത്രിശൂര്‍ ഗഡികളെല്ലാം കൂടി എന്താ ഈ കാട്ടിക്കൂട്ടണത്‌.
ക്രിസ്തുമസ്‌ മദ്യക്കച്ചവടത്തില്‍ ത്രിശൂര്‍ ജില്ലയില്‍ പെട്ട്‌ ചാലക്കുടി ഡിപ്പോ 'ഒന്നാംസ്ഥാനം' നേടി എന്ന് പത്രത്തില്‍ വായിച്ചു.ഞങ്ങള്‍ മഞ്ഞുമ്മല്‍ വാസികളെല്ലാം കൂടിയിരുന്ന് കുത്തിപ്പിടിച്ച്‌ കുടിച്ചിട്ടും കൊച്ചിക്ക്‌ രണ്ടാം സ്ഥാനം മാത്രം.നോക്കിക്കോ..കരള്‍ ചീഞ്ഞ്‌ ചത്തില്ലെങ്കില്‍ ഈ ന്യു ഈയറിനു ഒന്നാം സ്ഥാനം ഞങ്ങള്‍ തിരിച്ച്‌ പിടിക്കും.കൊച്ചിക്കരുടെ അടുത്താ കളി.ഇക്കാസിന്റെ തലേല്‍കെട്ട്‌ കണ്ടാല്‍ മതീല്ലോ നീയൊക്കെ മൂത്രമൊഴിക്കാന്‍.അധികം കളിച്ചാല്‍ കുമാറേട്ടനെ കൊണ്ട്‌ നിന്റയൊക്കെ ഫോട്ടോ എടുപ്പിക്കും.അല്ലേല്‍ പൂനേന്ന് സിജൂനെ വിളിപ്പിക്കും.എന്നിട്ട്‌ പറവൂര്‍ ഗോതുരുത്തീന്ന് വാറ്റിറക്കി എല്ലാ കൊച്ചിക്കടുവകള്‍ക്കും കൊടുത്ത്‌ നിന്നെയൊക്കെ തല്ലിക്കും,സോറി..മീറ്റിക്കും.
ഇടക്ക്‌ ചില മത്സരമൊക്കെ ഇവിടെ നടക്കാറുണ്ട്‌.മത്സരം മാത്രമോ..അയ്യപ്പന്‍ ബുദ്ധനോ ക്രിസ്ത്യാനിയോ എന്ന ഒരു വന്‍ തര്‍ക്കംകണ്ടു.ചിത്രകാരനും കിരണും എന്ന് വേണ്ട ഗള്‍ഫിലെങ്ങാണ്ട്‌ കിടന്ന് ഉറങ്ങിയിരുന്ന ദില്‍ബു വരെ ചാടിയെഴുന്നേറ്റ്‌ അഭിപ്രായം പറഞ്ഞു.
ഇനിയും പലരുമുണ്ടിവിടെ.
സുഗതരാജ്‌ പലേരി,സഹൃദയന്‍,ശിശു,നിക്ക്‌,കണ്ണൂസ്‌,അമ്പി,റ്റെഡി,വാവക്കാടന്‍,അഗ്രജന്‍,ദിവാസ്വപ്നം,ആദിത്യന്‍,ബെന്നി,നന്ദു,നവന്‍.......
പിന്നെ കുലപതികളായ സിബു,ഏവൂരാന്‍,അശ്വമേധം,ദേവേട്ടന്‍,അത്തിക്കുര്‍ശി...
മഹിളാമണികള്‍-ഇട്ടിമാളൂ,മുല്ലപ്പൂ,ഇഞ്ഞിപ്പെണ്ണ്‍....
ഞാന്‍ വായിച്ച പോസ്റ്റുകളും കമന്റുകളിലൂടെ പരിചയപ്പെട്ട വ്യക്തികളേയും പേരെടുത്ത്‌ പറഞ്ഞ്‌ ഒരു പുതുവത്സരം ആശംസിക്കണം എന്ന ഒരേയൊരു വികാരമേ എന്റെ മനസ്സിലുള്ളൂ.പുകഴ്ത്തലോ ഇകഴ്ത്തലോ അത്‌ എന്തായാലും മനപൂര്‍വ്വം തന്നെ ചെയ്തതാണു.
ഒരു നന്ദി പ്രകടനത്തോടെ ഈ അഭ്യാസം ഇവിടെ അവസാനിപ്പിക്കാം.
വക്കാരിക്ക്‌-താങ്കളുടെ എങ്ങനെ മലയാളത്തില്‍ ബ്ലോഗാം എന്ന ഒരു പോസ്റ്റാണു എന്നെ ഈ ബൂലോഗത്തില്‍ എത്തിച്ചത്‌.നന്ദി.
ബൂലോഗത്തിലെ എല്ലാ കൂട്ടുകാര്‍ക്കും അവരുടെ കുടുംബാംഗങ്ങള്‍ക്കും എന്റെ സ്നേഹം നിറഞ്ഞ പുതുവര്‍ഷാശംസകള്‍.

21 comments:

sandoz said...

വര്‍ഷാവസാനത്തില്‍ നാലു മാസം തികയുന്നു ഞാനിവിടെ കാല്‍ കുത്തിയിട്ട്‌.മഞ്ഞുമ്മല്‍ എന്ന കൊച്ചു ഗ്രാമത്തിലിരുന്ന്, മാസത്തില്‍ നാലു തവണ കേടാകുന്ന് ഒരു സിസ്റ്റം മുന്‍പില്‍ വച്ച്‌, ഒരു പേജ്‌ തെളിയാന്‍ അര മണിക്കൂര്‍ എടുക്കുന്ന ഡയല്‍-അപ്പ്‌ കണകഷന്റെ സഹായത്തോടെ ഞാന്‍ അനുഭവിച്ചതും കണ്ടതുമായ ചില കാര്യങ്ങള്‍ ഇവിടെ പോസ്റ്റുന്നു.[പുതുവര്‍ഷാഘോഷം ഇപ്പഴേ തുടങ്ങി.വീര്യം അകത്ത്‌ കിടക്കുന്ന ബലത്തിലാണു ഇത്‌ വച്ച്‌ കാച്ചിയത്‌.നാളെ കെട്ടെറങ്ങുമ്പോള്‍ എല്ലാ ബ്ലോഗിന്റേയും വാതില്‍ക്കല്‍ വന്ന് ക്ഷമ ചോദിക്കാനും സാധ്യതയുണ്ട്‌.]

തറവാടി said...

സന്‍ഡോസ് ,

ഇതു നന്നായി , രസിച്ചു ,

താങ്കള്‍ക്കും കുടുംബത്തിനും ( ബാചിയെങ്കില്‍ , അച്ഛനൌം , അമ്മക്കും ) നവവത്സരാശംസകള്‍
ഐശ്വര്യമുള്ള ഒരു നല്ല വര്‍ഷമാകട്ടെ , 2007 താങ്കള്‍ക്ക്

sandoz said...

തറവാടീ,
പണീം ഒപ്പിച്ച്‌ കിടുങ്ങി ഇരിക്കുവായിരുന്നു ഞാന്‍.ബൂലോഗത്തിന്റെ, ബുഷിനെ കിട്ടാത്ത ദേഷ്യം എന്നോട്‌ തീര്‍ക്കുമോ എന്നായിരുന്നു സംശയം.ഹാവൂ..സമാധാനമായി.

തറവാടി said...

പുലികള്‍ വരാനിരിക്കുന്നതേയുള്ളൂ!!!

( ഓ.ടോ: നല്ലതെന്നും നല്ലത് തന്നേയല്ലെ സന്‍ഡോസ്)

കരീം മാഷ്‌ said...

ആരെക്കുറിച്ചു ഇകഴ്ത്തിയാലും പുകഴ്ത്തിയാലും ഞങ്ങള്‍ക്കൊന്നുമില്ല. പക്ഷെ എന്നെയും പച്ചാളതിനെയും കുറിച്ചെന്തെങ്കിലും എഴുതിയിരുന്നങ്കില്‍ കാണാമായിരുന്നു!.

ദിവ (diva) said...

സാന്‍ഡോസ്,

പോസ്റ്റ് ഇഷ്ടപ്പെട്ടു. ന്യൂ ഇയറിന് പറ്റിയ ഓര്‍മ്മക്കുറിപ്പ്.പാരഗ്രാഫുകള്‍ തമ്മില്‍ ഇത്തിരി കൂ‍ടി അകലം ഇട്ടിരുന്നെങ്കില്‍ വായിക്കാന്‍ ഇത്തിരികൂടി എളുപ്പമായേനെ.

(ന്യൂ ഇയര്‍ പ്രമാണിച്ച് മിക്കവരും അവധിയിലാണെന്ന് തോന്നുന്നു)

-> നോട്ട് : അശ്വമേധവും ആദിത്യനും ഒരാള്‍ തന്നെയാണ്.

:)

Ambi said...

സാന്‍ഡോസുമാഷേ..
വളരെ നന്നായി.നവവത്സരാശംസകള്‍..

ഇപ്പം എത്ര ലാര്‍ജായി..(അതോ എത്ര ഫുള്ളായി എന്നു ചോദിയ്ക്കണോ..മഞ്ഞുമ്മല്‍ കോട്ടയത്തല്ലേ?:))

എന്തായാലും എനിയ്ക്ക് പറയാനുള്ളത് താങ്കള്‍ എഴുതിയത് പോലെതന്നെയുണ്ട്.ഇതിപ്പം ലോകം തന്നെ ഇതായി..ബ്ലോഗ് സ്ട്രീക്കിങ് എന്നാണത്രേ സായിപ്പിതിനെ വിളിയ്ക്കുക
എന്ത് പണ്ടാരമായാലും ദേ അതിരാവിലേ പതിനൊന്നരയ്ക്ക് എഴുനേട്ട് പല്ലുപോലും തേയ്ക്കാതെ ഇതിന്റെ മുന്നിലിരുന്നതാ.ഇപ്പം നാലര..വൈകിട്ട് നാലര..നാലഞ്ച് കട്ടങ്കാപ്പി, രണ്ട് സാന്‍ഡ്വിച്ച് ഇതുകളെടുക്കാന്‍ അടുക്കളയയില്‍ കയറിയതൊഴിച്ചാല്‍ ഇതിന്റെ മുന്നില്‍ തന്നെ..ബൂലോകത്ത്..തിരക്കില്ലാത്തതിന്നാല്‍ സുഖമായി എല്ലായിടത്തും കയറി..ക്ലബ്ബിലൊന്ന് പോയൊരു കന്റടിച്ച്..വീണ്ടും തനിമലയാളം തറാവാട്ടില്‍ പോയി പഴയ എന്റ്റികളൊക്കെ നോക്കി...അങ്ങനെയങ്ങനെ..

ബൂലോകര്‍ക്കെല്ലാം നവവത്സരാശംസകള്‍...

വേണു venu said...

സാന്‍ഡോസേ..
എന്തായാലും ഞാനും ഒന്നു രണ്ടു ലാര്‍ജും കഴിഞ്ഞാണു് നടക്കുന്നതു് എന്നു് പറഞ്ഞു വച്ചല്ലോ.(കറങ്ങി കറങ്ങി)
സാരമില്ല. ഇന്നു്30 ആയതെയുള്ളു.31 നായിരുന്നെങ്കില്‍ എന്നെ ശരിക്കും കറക്കിയേനേ.
ചുമ്മാ ഒരു വെരട്ടാ..പേടിക്കണ്ടാ.
ഞാന്‍ എന്‍റെ ആ ക്ഷമയുടെ കുടയങ്ങെടുത്തേക്കാം.
നല്ല രസമായ പോസ്റ്റാണെന്‍റെ സന്‍ഡോസ്സെ. ഇഷ്ടപ്പെട്ടു.
സാന്‍ഡോസ്സേ നവവത്സരാശംസകള്‍..
ബൂലോകര്‍ക്കെല്ലാം നവവത്സരാശംസകള്‍.

പച്ചാളം : pachalam said...

സാന്‍റോസ്,
പോസ്റ്റ് ആര്‍ഭാടന്‍ തന്നെ
രസിച്ചു വായിച്ചൂ..


(ഞാനിവിടൊക്കെ തന്നെയുണ്ടേ :)

sandoz said...

അമ്പീ,
മഞ്ഞുമ്മല്‍ കോട്ടയത്ത്‌ അല്ല.എറണാകുളം ജില്ലയില്‍ ആണു.ഏലൂര്‍ ഇന്‍ഡസ്ട്രിയല്‍ ഏരിയയോട്‌ ചേര്‍ന്ന് കിടക്കുന്ന ഒരു കൊച്ച്‌ മെട്രോപ്പൊളിറ്റന്‍ ഗ്രാമം.[ഉവ്വ]

sandoz said...

പേരും ബ്ലോഗിന്റെ പേരും തമ്മില്‍ കൂട്ടിക്കുഴഞ്ഞ്‌ പോയതാണു ആദിത്യന്റെ കാര്യത്തില്‍ സംഭവിച്ചത്‌.ക്ഷമിക്കണം[കലാപരിപാടി ആരംഭിച്ചു കഴിഞ്ഞു എന്ന് ഞാന്‍ മുന്‍ കൂര്‍ ജാമ്യം എടുത്തിരുന്നു.]

Anonymous said...

ബൂലോകത്തില്‍ ഞാനും പുതിയ ആളയാതിനാല്‍ എന്റെ ചിന്തകളുമായി സാന്‍ഡോസിന്റെ ചിന്തകളുമായ്‌ കുറെ സാമ്യങ്ങളുണ്ടു..ഒരു സമ്മിശ്ര പ്രതികരണം.പിണക്കങള്‍ കാണുമ്പ്പ്പോള്‍ ഒരു ചെറു ചിരി! ചിലതു വായിക്കുമ്പൊള്‍ എന്റെ ദൈവമെ എന്ന്. ചിലപ്പൊ എനിക്കൊന്നും മനസില്ലവണില്ലൊ എന്നു.
ചിലതു വയിക്കുമ്പൊള്‍ ഇവരെല്ലാം എത്ര നന്നായി എഴുതുന്നു ..എന്റെ ബ്ലോഗ്‌ അടച്ചു പൂട്ടണമെന്നു തോന്നും..(ആരും തടയില്ല എന്നറിയാം:-) ) ചിലപ്പോള്‍ ഈ കുറെ പേരോടു സംസാരിക്കാന്‍ കഴിയ്ന്നല്ലോ, ചിലതിനോടെങ്കിലും പ്രതികരിക്കാന്‍ കഴിഞ്ഞ്ല്ലൊ ..എന്നൊക്കെ കരുതി സന്തോഷിക്കും ..പക്ഷെ എത്രനാള്‍? അറിയില്ല ,ഒരു പാടു സമയം സ്വത്മായി ഇല്ലാത്ത എന്നെപ്പോലുള്ളവര്‍ക്കു ? എങ്കിലും വിട്ടുകളയാനും തോന്നില്ല..പുതുവര്‍ഷത്തില്‍ ഒരുപാടു പുതിയവര്‍ കടന്നു വന്നി ബൂലൊകം സുന്ദരമാകട്ടെ എന്ന പ്രാര്‍ഥനയൊടെ..പ്രിയംവദ
qw_er_ty

sandoz said...

പ്രിയംവദ,
കുറെ ചിരിച്ച്‌,വന്‍ തര്‍ക്കങ്ങള്‍ക്കിടയില്‍ എന്തെങ്കിലും പൊട്ടത്തരം വിളമ്പി,കുറച്ച്‌ സ്നേഹപ്പാരകള്‍ തിരുകി കയറ്റി പുതുവര്‍ഷത്തിലും നമുക്ക്‌ നമ്മുടെ അഭ്യാസം തുടരാം.

Anonymous said...

അതു മതിയൊ ..ഒരു confusion.. മതീല്ലെ?
ഇതൊരു കൂട്ടായ്മ മാത്രം..ല്ലെ.
ചക്കാത്തു വായന , അനുഭവിക്കട്ടെ അല്ലെ?

പക്ഷെ കാലം വിലയിരുത്തുമ്പ്പോള്?
‍പോകെ പോകെ ശരിയാവട്ടെ.
അപ്പ ശരി പറഞ്ഞപോലെ.( അസുരന്‍ ഗഡ്യോടു കടപ്പാടു)
qw_er_ty

കുറുമാന്‍ said...

സാന്‍ഡോസേ, ഹ ഹ ഹ, വീര്യമില്ലാതെ ഒരു പുതുവര്‍ഷം ആഘോഷിക്കാന്‍ കഴിയുമോ എന്നുള്ള പരീക്ഷണത്തിലാ, പക്ഷെ നടപ്പില്ല ദാസാ, നടപ്പില്ല. 30 മണിക്കൂറിലധികമായുള്ളാ വ്രതം ദേ അവസാനിപ്പിക്കാന്‍ പോകുന്നു.

പുതുവത്സരാശംസകള്‍ നേരുന്നു

sandoz said...

കുറുമാനേ,നേരം വെളുത്തു.എഴുന്നേല്‍ക്ക്‌.രാവിലേ എഴുന്നേറ്റ്‌ രണ്ടെണ്ണം അടിച്ച്‌ ഫ്രഷ്‌ ആവ്‌.

ikkaas|ഇക്കാസ് said...

ലതൊക്കെ കഴിഞ്ഞ് യിപ്പ വന്നതേയൊള്ളൂ.
സാന്‍ഡോസിനും മുതുവത്സരാശംസകള്‍. സോരി, പുതുവത്സരാശംസകള്‍.

വിചാരം said...

എനിക്ക് ആശംസകള്‍ നേര്‍ന്നവനെ ഒന്നു കണാനാ വന്നത് ന്‍റെമ്മോ.. ബൂലോകത്തിലെ എല്ലാരേയും കുപ്പിയില്ലാക്കി വിലസിയ പോസ്റ്റ് കണ്ടു ഞാന്‍ ഞെട്ടി .. അല്ലേലും ആരാ എനിക്ക് ആശംസകള്‍ നേരുക, കാലത്ത് കുളിച്ചു വരുന്ന പുഷ്പരാജന്‍ (എന്‍റെ സഹമുറിയനാണേ..) എന്നെ കണ്ടയുടനെ പറ്റിച്ചു ശകുനം മുടക്കി അവിടെയുണ്ട് ഈ പണ്ടാരം എനിക്ക് പുതുവത്സരാശസ നേരുമോ എങ്കില്‍ എന്‍റെയീ വര്‍ഷം ഗോവിന്ദ... എന്ന ആത്മഗതത്തോടെ എന്നെ കാണാത്ത ഭാവത്തോടെ റൂമിലേകൊരോട്ടം ... ഹു.. അവന് ആശംസനേരാഞ്ഞിട്ടാണോ എന്നു ഞാനും . എന്തിനാ വെറുതെ അവനിട്ട് കൊടുക്കണം ബൂലൊകമെന്ന വിശാലമായ ലോകമുള്ളപ്പോള്‍ ... അപ്പോ ഞാന്‍ തുടങ്ങട്ടെ!!! sandoz ഉം കുടുംബാംഗങ്ങള്‍ക്കും
സ്നേഹവും സന്തോഷവും
കരുണയും ദയയും
നന്മ നിറഞ്ഞ വിചാരങ്ങളും നിറഞ്ഞ
പുതുവത്സരാശംസകള്‍
നേരുന്നു

സുഗതരാജ് പലേരി said...

സന്‍ഡോസ്ജി വളരെ നന്നായി രസിച്ചു. ബൂലോഗത്തിലെ എല്ലാ കൂട്ടുകാര്‍ക്കും അവരുടെ കുടുംബാംഗങ്ങള്‍ക്കും എന്റെ സ്നേഹം നിറഞ്ഞ പുതുവര്‍ഷാശംസകള്‍.

Anonymous said...

മഞ്ഞുമ്മലേ,
രസിച്ചൂട്ടോ...
പുതുവത്സരാശംസകള്‍.

സസ്നേഹം
ദൃശ്യന്‍

Anonymous said...

സാന്‍ഡോസ്സേ കിടന്നില്ലേ, ഇപ്പം ഹൈദരാബാദില്‍ കിടന്നു കറങ്ങുന്നതു കണ്ടല്ലോ. ങും...ഞാന്‍ എന്‍റെ കുട മടക്കി പറയുന്നു. വീട്ടില്‍ പോ. ഗൊ റ്റു യുവര്‍ ഹോം. 2007 ലേ യ്ക്കു് സ്വാഗതം.